Работилници за зајакнување на капацитетите за родова рамноправност на локално ниво

Септември 2009

Министерството за труд и социјална политика и Програмата за Развој на Обединетите Нации (УНДП) организираа пет еднодневни работилници за „Внесување на родовата рамноправност во главните текови на локалните политики“ во рамките на проектот „Поддршка на Комисиите за еднакви можности за жените и мажите во единиците на локалната самоуправа“. Обуките беа наменети за Координаторите за еднакви можности и претседателите на Комисиите за еднакви можности за мажите и жените. Работилниците се оддржаа во: Струмица, хотел Илинден, 18 септември; Велес, хотел Романтик, 23 септември; Битола, хотел Епинал, 25 септември; Маврово, хотел Радика, 29 септември и Берово, Хотел Манастир, 30 септември 2009. Цел на обуките беше да се зајакнат капацитетите на различните сектори од општинската администрација во однос на разбирањето на родовата проблематика и родовиот „мејнстриминг“ преку Координаторите за еднакви можности и претседателите на Комисиите за еднакви можности за жените и мажите во едниците на локалната самоуправа.

Учесниците на обуките имаа можност да се запознаат со проектните цели и активности и се стекнаа со основни познавања за родовите односи и развој, родовите улоги и разлики. На обуките исто така се дискутираше значењето од внесување на родовата рамноправност во главните текови на политиките на локално и национално ниво. Учесниците се запознаа со концептот на собирање и анализа на податоци по основ на род и законската рамка и политиките за родовата еднаквост во земјата и во ЕУ. За време на работилниците, учесниците имаа можност да дискутираат и да постигнат заедничко разбирање за овластувањата, задачите и обврските на Комисиите и Координаторите за еднакви можности што треба да се уредат во статутот на секоја општина. Дополнително, учесниците се запознаа со родово буџетирање во единиците на локалната самоуправа. Четворица локални консултанти ги спроведоа обуките: Даница Јованова, Александар Шумковски, Љубенка Георгиевска и Весна Јованова. Обучувачите оддржуваа презентации групирани во 4 сесии и користеа различни вежби кои поттикнуваа отворени дискусии и работа во групи. Сесиите се изготвени врз основа на Програма за обука развиена од меѓународна консултантка ангажирана во рамките на проектот, Маргарет Апел, која што е во соогласност со резултатите и препораките од претходно направената проценка на капацитетите и потребите од обука на Комисиите и координаторите за еднакви можности.

Од вкупно 85 општини поканети, на обуките учествуваа 101 претставник од 56 општини (81 жени и 20 мажи). Во наредниот период (октомври – ноември 2009) ќе бидат спроведени уште 20 дводневни работилници за членовите на комисиите за еднакви можности на жените и мажите, односно советници од сите општини, како и представници на општинската администрација. Дел од тренинзите ќе бидат посветени на развивање на локални акциски планови за родова рамноправност.